Turizm

Buta Airways haqqında

Son zamanlar avropaya eləcə də dünyanın birçox yerinə səyahət edən vətəndaşların facebook gruplarında, eləcə də ətrafımızda ucuz təyyarə uçuşları barədə verdikləri suallar və buna bağlı olaraq onlar haqqında şikayətləri və s. nəzərə alaraq bu yazını yazmaq qərarına gəldim.

Bildiyiniz kimi Azərbaycanda 2017-ci ildən fəaliyyətə başlamış “Buta Airways” – “Azərbaycan Hava Yolları” (AZAL) QSC-nin struktur bölməsidir. Azərbaycanın yeganə loukoster şirkətidir. Bakı və Gəncə havalimanlarından uçuşlar həyata keçirir. Hansı ölkələrə uçuşlar həyata keçirdiyini buradan öyrənə bilərsiniz.

Loukoster nədir?

Əvvəla loukoster nə deməkdir bunu anlamaq lazımdır. Aşağıbüdcəli aviaşirkət. Sadə dillə açıqlasaq bu tip şirkətlərin məqsədi sərnişini bir nöqtədən digərinə aparmaqdır.Bəli sadəcə sərnişini aparmaq. Uçuş şirkətləri bir sərnişini aparmaq üçün birçox xərcə girir. Təbii ki, bu xərclərin başında sərnişinin yükü və yeyib içməyidir. Loukoster şirkətlərdə biletlər digər şirkətlərə nisbətən ucuz olur. Bunun səbəbi də həmin bu baqaj və yeyib içmək məsələsini biletə yansıtmamalarıdır. Siz sadəcə A nöqtəsindən B nöqtəsinə uçmaq üçün bilet alırsınız və sadəcə uçuşun pulunu ödəyirsiniz. Əgər baqajınız varsa və düşünürsünüzsə ki, yemək yeyəcəksiniz və hətta pəncərə qarşısında oturmaq istəyirsiniz, o zaman bunların hamısı üçün ayrılıqda pul ödəməlisiniz.

Buta Airways də eyni qaydalarla iki növ bilet təklif edir. Aşağıdaki şəkildə də gördüyünüz kimi Baqajsız (Büdcə) və Baqajlı(Standart) olmaqla iki növ bilet almaq mümkündür.

Ancaq burada diqqət edilməli bir neçə məqam var. Əgər siz Baqajsız bilet növünü seçirsinizsə baqaja qəti şəkildə yük verə bilməzsiniz. Təyyarənin göyərtəsinə əl yükü kimi istisnalar xaric heçbir əl yükü apara bilməzsiniz. İstisnalar isə bunlardır:

Əlavə olaraq, aşağıdakı ləvazimatların təyyarənin göyərtəsində pulsuz daşınmasına icazə verilir:

qadın əl çantası və ya kişi portfeli (üç ölçünün cəmi üzrə ölçüsü 75 santimetrədək)
portativ kompyuter (noutbuk)
gül dəstəsi
əl ağacı
çətir
kağızlar üçün qovluq
üst geyim
mobil telefon
fotoaparat
videokamera
portpleddə kostyum
Körpəni daşıma zamanı istifadə olunacaq uşaq beşiyi
hava gəmisinin salonunda və ya sərnişinin ayaq altında təhlükəsiz yerləşə biləcək dayaqlar
iki yaşa kimi uşaqlar üçün uçuş zamanı tələb olunan qida və əşyalar.

Büdcə yəni baqajsız biletlərin qaytarılması vəya dəyişdirilməsi mümkün deyil. Standart yəni baqajlı biletlərin isə 50%-i qaytarılır vəya 50% ödəniş etməklə dəyişdirilir.

Bunlardan əlavə olaraq, yer seçimi etmək istəyirsinizsə ödəniş etməlisiniz. Birinci sırada və qəza çıxışının yanında komfortlu yerlər – 25 avro, Ön sıralarda prioritet yerlər – 15 avro. Qeyd edim ki, əgər pul ödəmək istəmirsinizsə yer seçimi etmirsiniz və sistem sizə qeydiyyat zamanı ixtiyari bir yer seçimi edir.

Bir digər məsələ, Buta Airways-dən bilet almısınızsa, uçuşa qeydiyyatı özünüz etməlisiniz. Qeydiyyat uçuşa 24 saat qalmış başlanır. Bu nə deməkdir? Yəni uçuşa 24 saat qalmış siz, Buta Airways-in saytında Online Qeydiyyat səhifəsinə daxil olaraq, rezervasiya vəya bilet nömrəsini daxil edib vəya havalimanında quraşdırılmış xüsusi qeydiyyat köşklərində qeydiyyatdan keçməlisiniz 2 dəqiqə vaxtınızı alar uzağı. Bunu etməsəniz, hava limanında sizdən ödəniş tələb ediləcək. Baqajın isə qeydiyyatı uçuşa 60 dəqıqə qalmış bitir.

Aviaşirkətin tarifləri və əlavə xidmətlərlə bağlı məlumatı buradan əldə edə bilərsiniz.

Son olaraq onu da qeyd edim ki, Buta Airways yeni tikilmiş terminaldan yox, köhnə terminaldan uçur. :)

Buta Airways ilə bağlı qeydlərim bu qədər idi. Əlavə sualı olan varsa şərhlərdə qeyd edərsə bildiyim qədər cavablandıraram.

Hərkəsə uğurlu səyahətlər arzu edirəm )

Macarıstan Budapeşt səfəri haqqında.

Daha əvvəl Macarıstan səfirliyindən Viza almaq barədə yazmışdım. İndi isə həmin yazının davamı olaraq qısaca Macarıstan daha doğrusu Budapeşt səfəri haqqında yazmaq istəyirəm. Mən işlə bağlı getdiyim üçün əslində gəzmək üçün çox vaxtı yox idi ancaq maksimum dərəcədə gəzməyə çalışdım.

24 – 28 aprel tarixlərində Budapeştə oldum və elə başlayanda qeyd edim ki, çox bəyəndim. Bildiyiniz kimi Budapeşt şəhərini Dunay çayı iki hissəyə bölür Buda və Peşt. Mən daha çox Buda tərəfində qaldım ama çalışıb hər iki tərəfi gəzmək lazımdır. Hər iki tərəfdə çox gözəl gəziləsi yerlər var.

Ümumiyyətlə şəhərdə birçox heykəltəraşlıq nümunələri var. Avropaya ilk səyahətim olduğu üçün başqa ölkələrlə qarşılaşdırma edə bilməyəcəm.

Getdiyim tarixlərdə internetdən hava haqqında məlumatlara baxmışdım yağışlı və soyuq olacağı göstərilsə də Azərbaycan çox daha isti olduğunu qeyd etməliyəm. Qısa qolda rahatlıqlə gəzə biləcəyiniz hava var idi.

Budapeştdə Dunay çayı ətrafında istər piyada, istər velosipedlə, istərsə də çayın üzərində gəmilərlə səyahət edə bilərsiniz. Axşam saatlarında tarixi binların ışıqlandırıması ilə çox gözəl mənzərə ilə qarşılaşırsınız.

Nəqliyyat

Şəhərədə nəqliyyat baxımından çətinlik demək olar ki yoxdur. Şəhər içi avtobuslar, tramvaylar, metro hətta trolleybuslar (Peşt tərəfində gördüm Buda tərəfində trolleybus var mı bilmirəm) işləyir. Ancaq nəqliyyatdan və şəhərdə müəyyən yerlərdə quraşdırılmış elektronik velosipedlərdən istifadə etmək üçün Budapest Card almağınız vacibdir. Budapest Card ilə muzeylərdə, restoranlarda və s. xüsusi endirimlər də əldə etmək mümkündür.

Pul vahidi

Macarıstan avropa ölkəsi olsa da pul vahidi Forintdir. Ancaq mağazalarda Euro ilə ödəniş də etmək mümkündür. Belə ki, məzənnəyə uyğun olaraq (bir neçə forint daha ucuz) konvertasiya edirlər. Mən orda olarkən 1 euro təxminən 300-308 Forint idi. Ancaq nə badə aeroportda valyuta mübadiləsi edəsiniz. Çox aşağı məzənnə ilə konvertasiya edilir. Şəhərdə müxtəlif Valyuta mübadilə məntəqələrində qiymətlərə nəzər yetirib sonra əməliyyat etməyinizi tövsiyyə edirəm. Mübadilə məntəqələrinin bəziləri komissiya haqqı tutur buna da diqqət etmək lazımdır. Saat 18:00 dan sonra mübadilə məntəqələri və mağazalar işləmir.

Yazını payalaşmaq çox gec alındı. Bu səbəblə çox məlumat əlavə edə bilmədim. ))

Macarıstan səfirliyindən necə Viza almaq olar?

Açığı xaricə çox da səyahət etməmişəm. Rusiyada anadan olmuşam ancaq Azərbaycanda yaşamışam. Birneçə dəfə Rusiyaya gedib gəlmişəm. Tələbəliyim isə Türkiyədə keçib. Təxminən 5 il. Ancaq səyahət etmək, fərqli ölkələr, fərqli insanlar, fərqli adətlər ilə tanış olmaq , dünya görüşünü artırmaq üçün gözəl fürsətdir.

Türkiyə, Rusiya kimi ölkələrə getmək üçün Azərbaycan vətəndaşlarından bildiyiniz kimi Visa tələb olunmur. Ancaq Visa tələb olunan ölkələrə gedərkən həmin ölkənin səfirliyindən Viza almaq lazım gəlir və bu prosedurlar bir birinə bənzəsə də ölkələrə görə fəqrlilik göstərə bilir.

İşimlə bağlı ezamiyyət məqsədi ilə Macarıstana getməli oldum və bu müddətdə Viza üçün hara necə sənəd verdim bu barədə paylaşmaq istəyirəm.

Əvvəla onu qeyd edim ki, Macarıstan Schengen Viza ərazisinə daxildir və Schengen Vizası almalısınız.

Schengen nədir?

Şengen razılaşması – gömrük-sərhəd nəzarətinin ləğv olunması haqqında 14 iyun 1985-ci ildə 5 Avropa ölkəsi (Belçika, Niderland, Lüksemburq, Fransa, AFR) arasında Lüksemburqun Şengen şəhərində imzalanmış razılaşma. 26 mart 1995-ci il tarixindən qüvvəyə minmişdir.

Şengen zonası ölkələri arasında sərhəd yoxlama məntəqələri ləğv olunmuş və Şengen vizası almış turist və qonaqların Zona daxilində sərbəst hərəkəti təmin edilmişdir.

Qaynaq: Wikipedia

Deməli, 2016-cı il Yanvarın 25-dən etibarən Macarıstanın Azərbaycandakı səfirliyinin Konsulluq şöbəsində viza sənədlərinin təqdim edilməsi üçün “IFR System” – ərizənin bron vaxtının onlayn verilməsi sitemi tətbiq olunub. IFR System-in saytında daxil olaraq əvvəlcədən sıra almalısınız. Saytda ölkəni seçib (vətəndaşı olduğunuz ölkəni) və sizdən soruşulan şəxsi məlumatları daxil edərək sonda növbə ilə bağlı formanı çap edirisiniz. Formada aşağıdakı məlumatlar əks olunacaq:

Baku Consular Section of the Embassy (Republic of Azerbaijan)
Baku, 1004 Icheri Sheher, Mirza Маnsur u. 72.
Service window (if more than one): Window: 1. customer service window

Service date and time: 4/12/2017 Wednesday 12:30 PM – 4/12/2017 Wednesday 12:45 PM
Number of persons: 1

For any questions in relation to the service call:

Phone: 497-4579

Or visit the webpage of the office: http://www.mfa.gov.hu/emb/baku

Bu sıra nömrəsi ilə siz Macarıstan Səfirliyində (Xəritə üçün klikləyin) sənəd verə bilərsiniz. Bir digər yol isə Macarıstan Viza mərkəzində sənəd qəbulu mümkündür. Ancaq əgər Macarıstan Viza mərkəzinə getmək istəsəniz o zaman Viza rüsumundan (35 euro) əlavə olaraq sizdən 29 euro xidmət haqqı tələb olunacaq. Macarıstan viza mərkəzi rəsmi saytına buradan daxil ola bilərsiniz. Viza mərkəzinin avantajı odur ki, siz səfirliyə getmirsiniz. Lazımi sənədləri toplayaraq onlara verirsiniz və onlar sizin əvəzinizdən səfrlikdə lazımı işləri görüb vizanızı alırlar.

Hansı sənədlər tələb olunur?

Tələb olunan sənədlər Vizanın növünə görə dəyişir. Yəni turistik viza, təhsil vizası, biznes işgüzar viza və s. Ona görə də bunların hamısını burada yazmayacam. Yuxarıda qeyd etdiyim bağlantılardan sizin üçün lazım olan vizanın növünü seçərək lazımı sənədləri təyin edə bilərsiniz.

Sadəcə bəzi xırda nüansları qeyd edim. Tələb olunan sənədlər arasında tibbi sığorta və bankdan maaş kartı hesabından çıxarış tələb olunur. Tibbi sığortanın məbləği 30.000 euro olmalıdır. Bilməyənlər üçün bu əlçatmaz birşey kimi görünə bilər :) ancaq elə deyil. Bu sadəcə sizin sığortanızdır və əldə etmək üçün birçox turizm agentliklərinə yaxınlaşaraq səfərinzin müddətinə görə ortalama 10-30 azn qarşılığında tibbi sığorta ala bilərsiniz. Sənədlərinizi səfirliyə təqdim edərkən tibbi sığortanın surətini verin əsli sizdə qalsın. Çünki səfər zamanı sizdən istənilə bilər.

Digər məsələ isə bankdan maaş kartı hesabından çıxarışdır. Bu sənəd üçün banka yaxınlaşdıqda adətən ingilis dilində yazılmış hesab arayışı verirlər və qarşılığında 10 azn tələb edirlər (Azərbaycan Beynəlxalq bankından aldığım üçün oranı nümunə verə bilərəm).Ancaq Macarıstan səfirliyi üçün bu arayış lazım olmadı. Əvəzinə maaş kartı hesabınızdan son 6 ayın çıxarışını almaq bəs edir. Bir də ən əsası bu sənəd üçün notarius təsdiqinə ehtiyac yoxdur. Adətən var deyirlər ancaq əlavə xərc çəkməyin. Şübhəniz olarsa səfirliyə zəng edib dəqiqləşdirə bilərsiniz.

Bunlardan başqa səfərlə bağlı qalacağınız oteldən göndərilən rezervasiya ilə bağlı sənəd və biletiniz səfirlik tərəfindən tələb olunur. Və sonda onu da qeyd edim ki səfərinizə 15 gün qalana qədər viza üçün müraciət edə bilərsiniz. 15 gündən az qalıbsa səfirlik sənədinizi qəbul etməyə bilər. Ancaq şansınızı yoxlayın mütləq məndə 12 gün qalmışdı qəbul etdilər :)

Macarıstan ilə bağlı yazımı isə qayıdandan sonra paylaşacam :)