Aliexpress 11.11 və EPN cashback

Bildiyiniz kimi Aliexpress onlayn alışveriş saytı hər il 11-ci ayın 11-i birçox üründə endirim edir. Endirimə 10 günə yaxın vaxt qalmışkən həm bundan xəbərdar etmək həm də alışveriş zamanı necə cashback əldə edəbiləcəyinizi izah etmək istədim.

Bununla bağlı aşağıda kiçik bir video da paylaşacağam. Qısaca qeyd edim ki, bu endirim kampaniyası zamanı birçox ürünü 20-30 faiz endirimlə əldə edə bilərsiniz. Diqqət etməli olduğunuz məqamlardan biri cəld olmaqdır. Yəni almaq istədiyiniz ürün məhdud sayda ola bilər.

Bundan əlavə kuponlar əldə edə bilərsiniz. İstər bu kampaniya istərsə də adi vaxtlarda xərclədiyiniz məbləğin müəyyən hissəsini daha doğru desək müəyyən faizini geri qazana bilərsiniz. Bunun üçün epn cashbak sistemindən istifadə edərək Aliexpress saytına daxil olmağınız və alışverişinizi tamamlamağınız kifayətdir.

Müəyyən kategoriyalara görə faiz dərəcələri epn cashback saytında qeyd edilib. Hətta sadəcə Aliexpress saytında deyil birçox alışveriş saytında bu sistemdən istifadə etmək mümkündür. Alışveriş etdikdən sonra aldığınız ürün sizə təslim edildikdə Aliexpress saytında ürünü təslim aldığınızı qeyd etdikdən sonra 30 gün ərzində cashback epn hesabınıza otuzdururlur. 100$ olduqda həmin məbləği debet kartınıza çıxara bilər vəya 100$ olmasını gözləmədən 20 cent-dən yuxarı məbləği webmoney hesabınıza çıxara bilərsiniz.

EPN CASHBACK: http://ali.pub/2e2gp5
Aliexpress Gameland: https://goo.gl/vYiLjA
Aliexpress: http://www.aliexpress.com

Daha ətraflı aşağıdaki videonu izləyə bilərsiniz:

Green card üçün yeni qaydalar təklif edilib.

Bildiyiniz kimi Amerikanın Yaşıl kart (Green card) adlı programı hər il keçirilir və ildə 55 min nəfər Amerikada yaşamaq və işləmək hüququ qazanır.

Amerikanın yeni prezidenti Donald Trumpın göstərişi ilə Green Card sənəd qəbulu qaydalarında dəyişikliklər təklif edilib. Ancaq bu təklif hələ rəsmiləşməyib. Əgər konqres bu təklifi qəbul edərsə bundan sonra sənəd qəbulu bal sistemi ile aparılacaq. Yəni şansdan yox müəyyən kriteriyalarda asılı olaraq Green Card qazanma şansınız olacaq.

Təklif aşağıdaki kimidir:
Siz sənəd göndərərkən bir neçə kategoriya üzrə bal toplamalısınız və cəmi 30 bal olmalıdır ki, siz qalib gələsiniz.

1. YAŞ
  • 18-21 yaş aralığındasınızsa 6 bal,
  • 22-25 yaş aralığındasınızsa 8 bal,
  • 26-30 yaş aralığındasınızsa 10 bal,
  • 31-35 yaş aralığındasınızsa 8 bal,
  • 36-40 yaş aralığındasınızsa 6 bal,
  • 41-45 yaş aralığındasınızsa 4 bal,
  • 45-50 yaş aralığındasınızsa 2 bal,
  • 18 dən kiçik vəya 50 dən böyüksünüzsə 0 bal :)
2. TƏHSİL
  • US orta təhsil vəya öz ölkənizdə orta təhsil diplomu 1 bal,
  • Bakalavr diplomunuz varsa 5 bal,
  • Bakalavr diplomu US`ə aiddirsə 6 bal,
  • Magistr diplomunuz varsa 7 bal,
  • Magistr diplomu US`ə aiddirsə 8 bal,
  • Prof vəya doktorantura diplomu varsa 10 bal, US`ə aiddirsə 13 bal.
3. DİL (TOEFL vəya İELTS)
  • nəticə 60 % dən azdırsa 0 bal,
  • nəticə 60% – 80% arasındadırsa 6 bal,
  • 80%-90% arasındadırsa 10 bal,
  • 90% və daha çox 11 bal.
4. İŞ TƏKLİFİ
  • Əgər aldığınız iş təklifinin gəliri, gedəcəyiniz ştatın orta həcmli gəlirinin 150%-ni təşkil edirsə 5 bal,
  • Əgər aldığınız iş təklifinin gəliri, gedəcəyiniz ştatın orta həcmli gəlirinin 200%-ni təşkil edirsə 8 bal,
  • Əgər aldığınız iş təklifinin gəliri, gedəcəyiniz ştatın orta həcmli gəlirinin 300%-ni təşkil edirsə 13 bal,
5. Əlavə olaraq əgər Nobel mükafatçısısınızsa avtomatik 25 balınız var :)
6. Fərdi Olimpiya medalı sahibinə və ya nisbətən rəqabətli beynəlxalq idman fəaliyyətini qazanmış birinə 15 bal veriləcəkdir.
Təkrar qeyd edirəm ki, bu təklif hələ qəbul edilməyib.
 
 

Greencard “Confirmation Number” unudulubsa nə etməli?

Bildiyiniz kimi 2 may tarixindən etibarən Greencard nəticələri elan edilib. Sosyal şəbəkələrdə tez-tez confirmation number`ın itirilməsi/unudulması barədə oxuyuram. Düşündüm ki, kiçik bir video çarx ilə köməklik edim.

Aşağıdaki videonu izləyərək confirmation number necə bərpa edilir öyrənə bilərsiniz. Paylaşaraq videonun bilməyənlərə də çatması üçün köməklik göstərəcəyinizə əminəm :)

 

Pulsuz rəsmi greencard müraciəti

Greencard müraciəti haqqında bildiklərimi paylaşmak istəyirəm bu dəfə. Bəzi bildiyim məqamları qeyd etmək istəyirəm.

Greencard (yaşıl kart) nədir?

Greencard Amerikanın xarici vətəndaşlara verdiyi ömürlük vəsiqədir. Greencard sahibi olduqdan sonra rahatlıqla Amerikaya gedə bilər, orada universitet oxuya bilər, işləyə bilərsiniz. Qısaca desək Amerika vətəndaşları ilə eyni hüquqa sahib ola bilərsiniz. Sizə sadəcə, Amerika vətəndaşlarından fərqli olaraq səsvermə hüququ verilmir.

Necə müraciət edə bilərəm?

Greencard müraciətini edə biləcəyiniz birçox qurum var. Hansı ki, internetdə tez-tez belə qurumların reklamlarına rastlamaq mümküdür. Müəyyən məbləğ qarşılığında sizin məlumatlarınızı alaraq sizin əvəzinizə greencard müraciəti edirlər.

Bu paylaşımımın əsas səbəbi də məs elə bununla bağlıdır. Həmin vasitəçi qurumlar sizdən ödəniş alırlar. Bu ödəniş əslində əlavə xərcdir. Çünki siz heçbir xərc çəkmədən greencard müraciəti edə bilərsiniz. Onsuz da pullu greencard müraciəti yoxdur. Yəni həmin qurumlar sizdən xidmət haqqı alıb sizin əvəzinizə greencard müraciətini onsuz da pulsuz edirlər. Yəni daha aydın desək sizin görməli olduğunuz işi sizin əvəzinizə görüb qarşılığında sizdən pul tələb edirlər.

Ona görədə istədim bu məsələyə aydınlıq gətirim ki, öz müraciətinizi özünüz edə biləsiniz. Greencard müraciəti rəsmi olaraq Amerika xarici işlər nazirliyinin saytında qəbul edilir. Həmin sayta buradan daxil ola bilərsiniz.

Nə vaxt müraciət etməliyəm?

Greencard müraciəti ildə bir dəfə qəbul edilir. Adətən oktyabr ayının əvvəli başlayır və növbəti ayın (noyabr) əvvəlinə qədər davam edir. Bu tarix yuxarıda qeyd etdiyim bağlantıda hər il göstərilir. Məsələn bu il (2016), 2018 -ci il üçün greencard müraciətləri 4 oktyabr tarixindən 7 noyabr tarixinə qədər qəbul edilir.

Hansı sənədlər lazımdır?

Müraciət üçün heçbir sənəd tələb edilmir. Sadəcə 600×600 ölçülərində fotoşəkil tələb olunur və Online müraciət forması doldurularkən istifadə olunur. Fotoşəkil üçün bəzi qaydalar mövcuddur. Bu qaydalarla buradan tanış ola bilərsiniz. Həmin səhifədə sağ tərəftə qeyd edilən START PHOTO TOOL bölməsinə daxil olaraq çəkdiyiniz şəkli təlimata uyğun tənzimləyib yadda saxlayaraq müraciətinizdə istifadə etməyiniz məsləhətdir. Çünki bu təlimata uyğun olmayan fotoşəkil müraciətinizin diqqətə alınmamasına gətirib çıxara bilər.

Nəticəni necə öyrənə bilərəm?

Nəticələr yenə rəsmi səhifədə adətən may ayının əvvəlindən etibarən öyrənilir. Belə ki, müraciət zamanı sizə “confirmation number” verilir. Həmin “confirmation number” ilə nəticənizi rəsmi səhifədən öyrənə bilərsiniz. Qeyd edim ki, nəticə ilə bağlı heçbir məktub vəya elektron poçt göndərilmir. Ona görə də “confirmation number”`ı mütləq qeyd edib saxlamalısınız.

Digər məqamlar…

Bunlardan əlavə olaraq bəzi məqamları qeyd edim. Greencard hər il çəkiliş (lotoreya) üsulu ilə müxtəlif ölkə vətəndaşlarına verilir. Yəni greencard üçün ali təhsil, iş sahibi olmaq və s. heçbir üstünlük təşkil etmir.

Amerika greencard üçün qəbul etdiyini ölkələrin siyahısını hər il rəsmi saytda qeyd edir. Hər bir ölkənin müəyyən say limiti mövcuddur. Ancaq bu limit heçkəsə bildirilmir. Sadəcə bəzi mənbələrdə qeyd edilir ki, hər il fərqli limitlər müəyyən olunur. Bu da əvvəlki il verilən greencard vəsiqələrinə görə müəyyən edilir.

Greencard üçün müraciət etdikdə hansı ölkənin vətəndaşı olmağınıza baxmayaraq doğulduğunuz ölkənin say limitindən sayılırsınız.

Əgər evlisinizsə müraciət zamanı evli olduğunuzu, uşaqlarınız haqqında məlumatı doldurmalısınız. Bu zaman yoldaşınızın adından da başqa bir müraciət etməli və həmin müraciətdə də hər iki tərəf haqqında məlumatları tam doldurmalısınız. Nəticədə ikinizdən (siz vəya yoldaşınız) birinə greencard vəsiqəsi əldə etmə şansı verilərsə hər ikiniz və eləcə də uşaqlarınız greencard alma haqqına sahib olur.

Qeyd etmək istədiklərim qısaca bunlar idi. Onu da deyim ki, mən greencard almamışam. Şərhlərdə bunu nəzərə alamağınızı xahiş edirəm. Çünki bu paylaşımda məqsədim müraciət üçün əlavə xərc çəkməməyiniz üçün rəsmi saytı təqdim etməkdir.

Daha ətraflı məlumat üçün sonda paylaşdığım greencard haqqında təlimatlara nəzər yetirin. Türk  dilində təlimat mövcuddur.

Rəsmi sayt: https://www.dvlottery.state.gov/

Fotoşəkil ilə bağlı təlimat: https://travel.state.gov/content/visas/en/general/photos.html

Greencard haqqında təlimat: https://travel.state.gov/content/visas/en/immigrate/diversity-visa/instructions.html

İctimai nəqliyyatda müşahidələrim :)

Son günlərdə şahidi olduğum iki hadisəni paylaşmaq istəyirəm. Biri yaxşıdır biri pis! Biri IT sahəsində yaşlıların aktiv rol almağına olan ümidimi işıqlandırır, biri bakıda insanların daha anlayışlı, daha mədəniyyətli davranış sərgiləyəcəyi barədə ümidimi zədələyir.

Əvvəl pisdən başlayaq ki, sonu yaxşı bitirək :) Deməli bir neçə gün əvvəl (onu da qeyd edim ki, paylaşacağım hər iki hadisə eyni gündə yaşanıb) Əhmədli metrosunda qatardan enərkən 40-45 yaşlarında bir kişiyə gözüm sataşdı. O yaşlarda birinin nümunə olmağı lazım ikən metro stansiyasının ortasında sanki belə də olmalıymış kimi burnunda qazıntı işləri aparıb (üzr istəyirəm :) bura qədər hardasa başa düşə bilərdim.) sonra çıxartıdığı nadir tapıntını metronun sütununa sürtdü. Özündən razı şəkildə qatara minib çıxıb getdi. Bundan sonra metro sütunlarına da söykənə bilməyəcəm onu da aldı dayday əlimizdən. Düzdür o qədər dərd var bu onun yanında bəlkə də heçnədir ama xoş deyil.

İkinci hadisə isə belədir. Deməli ümumiyyətlə 40+ yaşlarında insanların (Azərabycanda) işləri kompyuterlə görməsi, elekron hesabatlar ilə işləməsi alqışlanası haldır. Çünki bir neçə dəfə bu yaş qrupundaki insanların kompyuter bacarıqlarının zəif olduğunu müşahidə etmişəm yəqin bu heçkəsə yad bir hal deyil. Ona görə də düşünürdüm ki, bu yaş qrupundaki insanlar elə belə də gedəcək öyrənmək istəməyəcəklər. Ancaq son vaxtlarda bu düşüncəmdə yanıldığımı hiss edirəm. Bir neçə 50+ yaşlarındaki proqramçılarla, sistem administratorları ilə rastlaşdıqdan sonra anladım əmin oldum ki, hərşey həqiqətən də həvəsdən və özünü inkişaf etdirməkdən, təmbəllik etməməkdən asılıdır.

Deməli avtobusda 40 yaşlarında bir xanımın telefonla məşğul olduğunu gördüm. Artıq öyrəşmişik bütün yaş qruplarındaki insanların avtobusda, metroda telefonda oyun oynamaqlarına. Ancaq telefon böyük olduğundan və ayaq üstə durduğumuzdan məcburən görürük telefonun ekranını. 40 yaşlarındaki xanım Teamviewer proqramı ilə avtobusda ikən kompyuterə daxil olub hansısa hesabatda düzəlişlər etdi. Sonra onu e-poçt ünvanına göndərdi ardından da telefonda excel faylında dəyişikliklər edib onu da e-poçt ilə göndərib işini bitirdi. Açığı çox təəccübləndim nə yalan deyim. :) Ancaq Əhsən!

Belə, bunu da yazdım ki, bir neçə il sonra bu postu görüb qarşılaşdırma edə bilim vəziyyəti.

CSS3 ilə arxa plan rənginin hərəkətli keçidi

Bu yazımda müasir veb səhifələrdə gördüyünüz menyuların üzərinə gəldikdə arxa fonunun sağdan sola, soldan sağa, aşağıdan yuxarı vəya tərsinə hərəkətli keçidini necə edə biləcəyinizi göstərmək istəyirəm:

Əvvəla səhifəmizə bir düymə əlavə edək:

İndi isə əlavə etdiyimiz düyməni css ilə rəngləndirək və əsas kodlarımızı yazaq:

Kodları açıqlayaq. Deməli əvvəla .duyme sinifini yaratdıq və düyməyə kənarlıq verdik. Arxa fonunu (background:none;) rəngsiz, mövqeyini nisbi (position:relative;) seçdik. Çünki bir sonrakı addımda mövqeyi mütləq edəcəyik və bunun üçün də əvvəlki mövqe nisbi olmalıdır. Transition: color 0.25s ease; kodları isə düymənin üzərinə gəldikdə yazı rənginin keçidli şəkildə dəyişməsi üçündür.

Sonrakı addımda .duyme::after kodları ilə arxa fonumuzu yaratdıq. Burada önəmli olan position:absolute; dəyərinin verilməsi, daha sonra genişliyin sıfır dəyərində saxlanılmasıdır. Hərəkətin keçidli şəkildə olması üçün isə yenə də transition:width 0.25s ease; kodlarından istifadə etdik. Diqqət etsəniz görərsiniz ki yuxarıda transition kodunda color`dan istifadə etmişdik çünki dəyişəcək dəyər rəng idi. İndi isə transition kodunda width istifadə etdik çünki genişliyimiz sıfırdan 100 faize doğru dəyişəcək və nəticədə hərəkətli keçid alınacaq.

Hərəkətli keçidin alınması üçün son addım ise .duyme:hover::after kodunuz yazmaqdır. Bu kodun mənası belədir ki, .duyme sinifinin üzərinə gəldikdə .duyme::after sinifində aşağıdaki (width:100%) dəyişiklikləri et.

Ümid edirəm başa sala bildim. :)

Əlavə olaraq qeyd edim ki, kodlarda .duyme::after bölməsində left:0; yerinə right:0; istifadə etsək arxa fon rəngi soldan sağa yox, sağdan sola dəyişəcəkdir.

Buyurun bu da nəticə.

Myphone.ae biyabırçılığı!

Deməli belə myphone.ae saytı ilə yaşadığım problemi paylaşmaq istəyirəm. Paylaşım ki, səhv edib həmin saytla alış-veriş etməyəsiniz.

Reklamlarından, təriflərindən yaxşı xidmət olacağını ümid edib bir dəfə alışveriş etmişdim və aldığım telefon vaxtında mənə çatdırılmışdı. Həmin vaxtlarda dollar qalxmamışdı və ofisləri Azərbaycanda idi.

Yaxın tarixlərdə dostum myphone.ae saytında qeyd edilən parametrlərə inanıb telefon sifariş etdi və məlum oldu ki, myphone.ae saytında parametrlər səhv yazılıb. Bank hesablarına ödənilən 260 dollar məbləğindəki pulu geri istədi və nəticədə 250 dollar məbləğində pulu mənim bank kartıma göndərdilər.10 dollar kəsinti oldu.

Vəziyyət elə gətirib çıxartdı ki, yenə həmin saytdan sifariş verməli olduq çünki başqa saytda istədiyimiz telefonu tapa bilmədik. Həmin dostum xahiş etdi ki, sifarişi mən edim. 23 iyun tarixində telefonu sifariş etmək üçün sayta daxil oldum. Parametrləri dəfələrlə online əlaqə vasitəsilə Aysun adlı xanımla dəqiqləşdirdim. Dəfələrlə qeyd etdim ki, problem olmayacaq ki?, bir dəfə problem yaşayıb yenidən sifariş veririk. Dəfələrlə soruşdum və qeyd etdim ki, danışıqlarımızı sübut kimi saxlayacam və problem olarsa pulu geri qaytarmağınızı istəyəcəm 1 qəpik də kəsinti etməməlisiniz. Aldığım cavab belə oldu ki, biz pulu tam qaytarırıq. Nə isə bu məsələni çox uzatmadım.

Təkrar problem olub olmadığını dəqiqləşdirib pulu ödədim və saytda yazılan qaydalara əsasən Aysun xanıma dedim ki, 18:00`dan əvvəl sifariş verdiyim üçün bugündən sifarişimi təmin edin. Yaxşı dedi və saytda 28-30 iyun tarixləri üçün sifarişimin çatacağı qeyd olundu.

27 iyun tarixində saytda daxil oldum və heçbir izləmə kodunun daxil edilmədiyini görüb əlaqə saxladım yenə online əlaqə vasitəsi ilə. Bu dəfə Ulduz adlı xanımla danışdım problemi qeyd etdim yardımçı olmadı sadəcə dedi ki bəs hesabımdan sorğu açmalıyam. Sorğu açdım və yazdım ki, niyə izləmə kodu daxil edilməyib? Sifarişim verilibmi? Verilməyibsə səbəbi nədir. Əgər sifarişim verilməyibsə pulumun geri qaytarılmasını tələb etdim.

Aldığım cavab isə sadəcə o oldu ki, 2 günə sifariş veriləcək. Diqqət edin sifariş əlinizə çatacaq yox, sifariş veriləcək. Təbii ki, dəfələrlə yazdım ki, suallarıma cavab verin, dəfələrlə qeyd etdim ki, səbəbini qeyd edin ancaq aldığım cavab sadəcə sifarişin veriləcəyi oldu və heçbir istəyimi yerinə yetirmədilər.

2 iyul tarixində sifarişimi Dubaydan sifariş ediblər. Bəli bəli 23 iyun tarixində verilməli olan sifariş 2 iyul tarixində verilib və yazdığım sualların heçbirinə cavab verməyiblər. Dəfələrlə insanları araya qoyduqlarını, suallarıma niyə cavab vermədiklərimi ünvanlasam da heçbir cavab ala bilməmişəm.

Online əlaqə vasitəsi ilə həm Ulduz həm də Aysun adlı şəxsiyyətlərə dəfələrlə mənim sorğuma düzgün cavab verilmədiyini desəm də, hər dəfə “təəssüf etdiklərini”, sorğumun araşdırıldığını qeyd ediblər. Mən də dəfələrlə araşdırma falan olmadığını, sadəcə söhbəti fırlatdıqlarını iki kəlmə ilə sifarişin göndəriləcəyini yazdıqlarını desəm də, insanları araya qoymaqdan başqa bir iş görmədiklərini bildirsəm də dəyişiklik  olmayıb.

Onu da qeyd edim ki, danışıqlarım sübut kimi hələ də əlimdədir. Qarşı tərəf inkar edərsə dəqiqəsinə saniyəsinə qədər hərşeyi sübut etməyə hazıram.

Odur ki, siz siz olun Myphone.ae saytından alışveriş etməyin. Sakit başınızı ağrıtmayın. Məndən sizə tövsiyyə. Sizə hörmət göstərməyən insanlara xeyir verməyin!

Azərbaycan bankları PayPal-a razılıq veriblər.

Daha əvvəl Paypalın Azərbaycan hesabları üçün ödəmə qəbul etmədiyini qeyd etmişdim. Bugün xəbər saytlarından oxuduğum qədəri ilə Azərbaycan bankları Paypal əməliyyatlarına müsbət baxır və bu əməliyyatlara maraqlıdırlar.

Əlbəttə sevindirici haldır. Paypal ilə razılıq əldə olunarsa və paypal əməliyyatları Azərbaycan hesabları ilə problemsiz fəaliyyət göstərərsə internet alışverişləri üçün çox müsbət hal olacaq. Həm freelancerlar üçün yeni iş imkanları yaranar həm də sahibkarlar internet üzərindən ebay, aliexpress kimi nəhəng saytlarda satışlarını reallaşdıra bilərlər.

Hər bir halda internet üzərindən alışverişin yaygınlaşması üçün müsbət hal olacaq.

Ümid edək ki, bu xəbər tezliklə öz təsdiqini tapacaq və bizlər üçün şad xəbərin müjdəçisi olacaq. :)

Unibankdan Novruz Hədiyyəsi!

İnternetdən alışveriş edənlər, debet kartlardan istifadə edənlər üçün maraqlı bir kampaniyanı tanıtmaq istədim. Açığı Unibankla əlaqəli bir neçə yazımda müsbət rəy vermişəm ancaq elə anlaşılmasın ki, bunlar reklam məqsədli yazılardır. Sadəcə Unibankın müştərisi olaraq mənə görə müsbət olan xidmətləri paylaşmışam.

Deməli, aktif olaraq internet üzərindən alışveriş edirəm, lazım gəldikdə ATM (bankomat) vasitəsi ilə hesabıma vəsait daxil edirəm. Nəticədə mütəmadi olaraq debet kartlara ehtiyac duyuram. Birçox banklarda debet kartların verilməsində istifadəsində fərqliliklər mövcuddur. Hardasa 2-3 ildir Unibank Visa Electron manat hesabını istifadə edirdim. Ancaq bu kartla nağdlaşdırma zamanı minimum 1 manat maximum 1 % komissiya tutulurdu. Onu da qeyd edim ki, visa electron kartını pulsuz sifariş etmişdim ancaq hesaba müəyyən bir məbləğ yerləşdirərək almışdım. Məbləği tam xatırlamıram ancaq hazırda Unibank tərəfindən Visa Electron kartları verilmir.

Daha sonra Albalı debet kart sifariş ettim dollar hesabı açdırdım. Albalı debet kartının fərqi 3 illik kartın 10 dollar və nəğdləşdirmənin komissiyasız olması idi.

debet-novruz

Hazırda Unibankın Novruz bayramı münasibəti ilə, martın 1-dən 30-dək Albalı debet kartlarının pulsuz sifarişi kampaniyası keçirilir. Düşünürəm ki, mütəmadi olaraq debet kartlardan istifadə edən şəxslər üçün gözəl kampaniyadır. Həm kart pulsuz verilir, həm də komissiya 0 faiz ilə hesablanır. Daha nə istəyirsiniz? Bunlardan əlavə olaraq kartı Visa vəya Mastercard ödəniş sistemi üçün sifariş etmə imkanı da mövcuddur.

Ən gözəl xəbər isə artıq Unibankın ödəmə terminallarından daxil etdiyiniz vəsait, həmin an hesabınıza oturacaq. Bu əməliyyat yaxın tarixlərə qədər gündə bir dəfə axşam saatlarında həyata keçirilirdi. Yəni karta daxil etdiyiniz vəsait axşam səhv etmirəmsə saat 19:00-dan sonra hesaba otururdu.

İnternetdən qazanc əldə edənlər üçün bu fürsət məncə qaçırılmamalıdır. ;)

Əlavə məlumat üçün kampaniya səhifəsinə nəzər yetirə bilərsiniz.

Kiril əlifbası ilə yazılan mətni Latın əlifbasına çevirmək

Azərbaycan dilində hazırladığım ilk video dərslik olduğu üçün səhvlər ola bilər üzrlü hesab edin. Başlıqdan da göründüyü kimi mövzu kiril əlifbası ilə yazılan mətnlərin latın əlifbasına çevirilməsidir.

Gördüyüm şahid olduğum qədəri ilə dövlət qurumlarının əksəriyyətində hal-hazırda kiril əlifbası ilə mətnlər yazılır və A1 Lat, A3 Arial AzLat şriftləri ilə latın əlifbası kimi göstərilib çap etdirilir. Yəni əslində bir problem yoxdur. Kiril (klaviaturadaki rus şriftləri ilə) əlifbası ilə yazırsınız və latın əlifbası ilə görüntüləyirsiniz. Ancaq diqqət etdikdə görmək olar ki, şriftlər çox bərbad formada görünür. Bundan başqa həmin sənədi latın hərfləri ilə yazan birinə göndərdikdə əziyyət çəkir. Bir-bir həmin hərfləri latın hərflərinə çevirməli olur. Elə bu əməliyyatda çətinlik olmaması üçün aşağıdaki videonu paylaşmaq istədim. Latin.az saytında paylaşılan convert.bas faylını istifadə edərək çox asanlıqla kirilcə tərtib edilmiş mətni, birdəfəlik latın əlibası hərflərinə çevirərək istifadə edə bilərsiniz.

 

Magistratura səviyyəsinə qəbul üçün qeydiyyat başlayır.

Hər il çalışıb mümkün olduğunca bütün imtahanlara girən biri olaraq magistratura imtahanına girməyinizi tövsiyyə edirəm. Düzdür magistratura imtahanına hər il girirəm ancaq çox güclü (!) hazırlaşdığıma görə həmişə pulluya qəbul oluram :)

Hər halda oturub hazırlaşmaq lazımdır. İşləyərək imtahana hazırlaşmaq üçün vaxt ayırmaq çətindir amma işləməyənlər üçün fikrimcə hazırlaşmaq olar. Hər gün bir neçə test həll etmək belə kifayət edir deyə düşünürəm. Uzun sözün qısası boş vaxtınız olanda imtahanlara girin sadəcə biliklərinizi təkrar etmək üçün belə yaxşıdır imtahana girmək. :)

Bu ilki magistratura imtahanının 1-ci mərhələsi üçün ərizə qəbulu 10 tarixindən 19 fevral tarixinə qədər davam edəcək.

Bu ilki plan-qrafik aşağıdaki kimidir:

Tədbir Tarix (2016)
Ali təhsil müəssisələrinin magistratura səviyyəsinə:
–          ərizə qəbulu 10- 19 fevral
–          QƏBUL İMTAHANI – 1-ci mərhələ 06 mart
–          jurnalistika ixtisaslaşmalarını seçən bakalavların qeydiyyatı 11-20 aprel
–          jurnalistika ixtisaslaşmalarını seçən bakalavların qabiliyyət imtahanı 26-29 aprel
–          proqram seçimi 03- 10 may
–          QƏBUL İMTAHANI – 2-ci mərhələ 05 iyun
       –     AMEA-nın magistratura ixtisaslaşmalarını seçən bakalavrların

qeydiyyatı

9-12 iyun
       –     AMEA-nın magistratura ixtisaslaşmalarını seçən bakalavrların

müsahibəsi

13, 14, 16, 17 iyun
–          ixtisaslaşma seçimi 09-19 iyun
–          bakalavrların qəbul olduqları təhsil müəssisələrində qeydiyyatı 29 iyun – 11 iyul
–          boş qalan yerlərə ixtisaslaşma seçimi 08- 14 avqust
–          boş qalan yerlərə qəbul olan bakalavrların qəbul olduqları təhsil müəssisələrində qeydiyyatı 16-25 avqust
Ali təhsil müəssisələrinin tibb ixtisaslarının rezidentura səviyyəsinə:

 

–          ərizə qəbulu 01- 10 mart
–          QƏBUL İMTAHANI 1-ci mərhələ 03 aprel
–          QƏBUL İMTAHANI 2-ci mərhələ 29 iyul
–          ixtisaslaşma seçimi 01 -07 avqust
–          namizədlərin qəbul olduqları təhsil müəssisələrində qeydiyyatı 09-15 avqust
–          boş qalan yerlərə ixtisaslaşma seçimi 19-22 avqust
–          boş qalan yerlərə qəbul olan namizədlərin qəbul olduqları təhsil müəssisələrində qeydiyyatı 24-25 avqust

Qaynaq: TQDK

Ailə tərkibi haqqında arayış – Forma N2

Daha əvvəl bəzi arayış formalarının əldə edilməsi haqqında yazı paylaşmışdım. Vətəndaşların işini asanlaşdırmaq, bilməyənlər üçün arayışların onlayn vəya dövlət qurumlarından asanlıqla necə əldə ediləcəyi barədə məlumat vermək məqsədi ilə növbəti arayış növünün alınması prosesindən danışmaq istəyirəm.

Yaşadığınız ünvanda kimlərin qeydiyyatda olduğunu öyrənmək üçün lazım olan Forma N2 adlandırılan (ailə tərkibi haqqında arayış vəya yaşayış yeri üzrə qeydiyyat haqqında arayış da deyilir) arayış birçox halda lazım olur.

Əslində bu arayışı JEK deyə adlandırdığımız mənzil istismar sahələri verir. Ancaq bir neçə dəfə müraciət etsəm də artıq onların vermədiyini, ASAN xidmət mərkəzlərindən əldə ediləcəyini qeyd edirdilər. Yaxın tarixlərə qədər ASAN xidmət mərkəzləri bu sənədi vermirdi (bir neçə dəfə onlara da müraciət etmişdim).

Hazırda bu sənədi ASAN xidmət mərkəzlərindən almaq mümkündür, mərkəzdən öyrəndiyim qədəri ilə mənzil istismar sahələrindən bu səlahiyyət də hələki alınmayıb. Yəni onlar da bu sənədi əslində verə bilirlər.

01.06.2016 tarixində 2 saylı ASAN xidmət mərkəzinə yaxınlaşaraq bu arayışı əldə edə bildim. ASAN xidmət mərkəzinin rəsmi internet səhifəsindən Yaşayış yeri üzrə qeydiyyatda olan şəxslər haqqında arayışın verilməsi səhifəsinə daxil olaraq bu barədə məlumat əldə edə bilərsiniz.

Arayışı əldə etmək üçün sadəcə şəxsiyyət vəsiqəsinə ehtiyac var. Onu da qeyd edim ki, xidmət ödənişsiz həyata keçirilir, yəni heçbir dövlət rüsumu nəzərdə tutulmayıb.

Xüsusi qeyd olaraq bildirilir ki, xidmət müvafiq “ASAN xidmət” mərkəzinin əhatə dairəsində yaşayış yeri üzrə daimi qeydiyyatda olan şəxslərə göstərilir.

Arayışın nümunəsi:

aile-terkibi-haqqinda-arayis

Xidmət göstərməyən “Texniki servis”

Bu yazımda İrşad Electronicsin Texniki Servisinin necə işlədiyindən daha doğrusu işləmədiyindən danışacam. Deməli bir il bundan əvvəl İrşad Electronicsin internet səhifəsindən notebookları incələrkən gördüm ki, birçox məhsulun qarşısında Refurbished olduğu yazılıb. Refurbished təmir olunmuş məhsullara deyilir. Yəni ki, fabrik qüsuru olan məhsulların təmir olunmuş versiyalarını online vəya şəhərdəki mağazalarında satırlar. Sonra bu haqqda İrşad Electronics`in facebook səhifəsində yazdım nəticədə isə hələ də həmin səhifədə bloklanmışam heçbir şərh yaza bilmirəm ki ehtiyac da yoxdur. Bu belə. Bundan sonra özüm və məndən İrşad Electronics haqqında soruşanlara heçvaxt oranı tövsiyyə bilmədim. Ancaq bu mağaza ilə qarşılaşdığım bir neçə hadisəni və sonda da bugün (13.11.2015) yaşadığım problemi qeyd etmək istəyirəm.

refurbished

Yuxarıdaki şəkildə vəziyyəti bölməsinin qarşısında Refurbished yazılıb.Bundan bəhs edirdim.

Hadisə 1

Yenə birgün İrşad Electronics mağazasına yolum düşdü qiymətlərlə maraqlanmaq üçün. Mağazada dostumla qarşılaşdım. Notebook alıb ancaq problem yaranıb və gətirib mağazaya ki, yenisiylə əvəz etsin. Mənə məsələni danışdı və kompyuterə baxdım ki, yuxarıda qeyd etdiyim kimi Refurbished məhsuldur. Bunu elə qutusundan da bilmək olar. Qutuda heçbir qoruyucu yoxdur sadəcə kompyuteri atıblar kağız qutuya vəssalam. Satıcı ilə söhbət edib məsələni daha da aydınlaşdırdıq və qəbul etdilər ki, bəli bu məhsul təmir olunub sonradan satışa çıxarılıb. Ancaq mağaza administratoru satış zamanı biz məhsulun təmirli olduğunu deyib satırıq deyə çıxış etdi. Dostum isə bizə bu haqqda məlumat verilmədiyini bildirdi. Nəticədə uzun haqq hesabdan sonra məhsul geri qaytarıldı. Onu da qeyd edim ki, məhsul qaytarılarkən satıcı cavan oğlanla administrator arasında gizli münaqişə də yarandı. Guya biz eşitməyək deyə alçaq səslə “sən niyə qəbul etdin ki, təmirdən gəlib” deyirdi satıcıya.

Açığı mən hələki İrşad Electronics mağazalarında hansısa satıcının məhsulu təklif edərkən bu məhsul təmirdən gəlib dediyini görməmişəm. Görən olubsa çox yaxşı minnətdaram. Bu hadisə də belə. Keçək ikinci hadisəyə.

Hadisə 2

Deməli yuxarıda qeyd etdiyim məhsulun geri qaytarılması zamanı dostumu gözləyərkən satıcıya sual ünvanladım ki, bəs  deyək mən iphone alsam getsəm bir həftə sonra gəlsəm ki, bu telefonda problem var və siz də təsdiqləsəniz ki, bu fabrik xətasıdır neynirsiniz o məhsulu? Satıcı qeyd etdi ki, geri qaytarırıq. İkinci sualım da belə oldu ki, bəs geri qaytardıqdan sonra o məhsul necə olur? Cavab isə tam gözlədiyim kimi oldu. “Təmir lazımdırsa təmir olunub yenidən vitrinə qoyulur və yeni telefon kimi satılır.” Bu da belə.

Hadisə 3

İndi gələk bir başa mənim yaşadığım problemə. Qeyd etdiyim kimi heçkimə tövsiyyə etmirəm bu mağazanı. Ancaq vəziyyət elə alındı ki, evdə təxminən bir iki gün içərisində hər iki notebook`um xarab oldu. (5-6 illik notebooklar idi.) Təcili notebook`a ehtiyacım oldu və başqa mağazada adıma aktiv kredit olduğu üçün tək çıxış yolum İrşad Electronics oldu. Çünki bu mağazadan heçvaxt məhsul almamışam ancaq müraciət etsəm mütləq verəcəklərini bilirəm. Beləcə internetdən Refurbished olmayan Yeni bir notebook sifariş verdim. Elmlər metrosunun qarşısında sifarişi qəbul etdim. Heçbir problem olmadan 11 ay istifadə edildi notebook. Zəmanətinə 1 ay qalmış (24 Noyabr 2015 də zəmanəti bitir) yəni 24 Okytabr tarixində notebook`u texniki servisə təhvil verməli oldum. Qəbul etdilər. Problem isə belə idi. Monitorda çox kiçik bir nöqtədə piksellər qaralmağa başlamışdı. 2-3 piksel qaralmışdı və gün keçdikcə bu artıb 2-3 düz xətt əmələ gətirmişdi xırda xəttlər. Bir neçə gün sonra mesaj gəldi ki xərci 90 AZN edir. Zəng etdim və zəmanəti olduğunu qeyd etdim. Qarşı tərəf dəqiqləşdirib məlumat verəcəyini qeyd etdi. Xahiş etdim ki, tezliklə mənə xəbər verin məsələ haqqında. Ancaq heçbir xəbər ala bilmədim.

Yenidən zəng etdim həmin nömrəyə ancaq işləmədi. *0171 nömrəsindən əlaqə saxladım aldığım cavab isə o oldu ki, texniki servisə yaxınlaşmalısınız burdan məlumat əldə etmək olmur. İndi yaxşı bəs bu nömrə nə üçündür? Nə isə.

Üz tutdum texniki servisə. Məsələni aydınlaşdırmaq üçün özümü tanıttım və notebook`u gətirib başladılar ki, bu notebook istifadəçi xətasına görə belə olub düzəldə bilmərik pulsuz. Bir neçə nümunə göstərib qeyd etdim ki, bu monitor heçbir zədə almayıb. Çünki zədə alsaydı nəticə fərqli olardı. Bunları da fərqli şəkillərlə göstərdim. Ancaq təbii ki, qəbul etmədilər. Dedilər ki, bizim təcrübəmiz göstərir ki, kompyuterin monitoru durduğu yerdə belə ola bilməz. Ancaq bu məsələdə azca anlayışı olan biri şəkilə baxaraq bunun hansısa zədədən əmələ gəlmədiyini anlaya bilər. Hansı ki, texniki servisdəki işçilər də gözümün içinə baxa baxa düz olduğumu sadəcə başlarındaki adama tabe olduqları üçün ağızlarını aça bilmədiklərini mimikaları ilə göstərirdilər.

Biraz deyişmədən sonra texniki servisdəki bu məsul şəxs bir quş da buraxdı ki, monitora zəmanət verilmir. Əlimdəki zəmanət talonunu uzadıb bura niyə yazmamsınız dedim. Cavab isə ikinci quş oldu. Orda yazılıb! Kənardan işçilərdən biri də – Hər halda gözünə girmək istəyir məsul şəxsin –  dedi ki yazılıb. Dedim xahiş edirəm göstərin mən oxudum ama görmədim. Başladı oxumağa biraz da mənə sarı uzadıb dedi buyurun Klaviatura, Çexol, Mouse və s. səsi alçaldı. Monitor yazılmayıb çünki. Dedim bəs hanı yəqin və s. yazmısınız ora daxildir? Əlbətdə cavab olmadı. Yenə də monitora zəmanət vermədiklərini qeyd etdi. Bəs monitora zəmanət vermisinizsə niyə qəbul edirdiniz gətirəndə?

toshiba lcd

Məsələ burasındadır ki, əgər həqiqətən bu monitor hansısa zərbəyə görə bu hala düşsəydi mən bu uzunluqda yazı yazıb özümü aldatmazdım. Sadəcə öz özümə deyərdim ki, irşad electronicsi aldatmaq istədim ama aldanmadılar və susardım. Ancaq nəticədə istifadə etdiyim məhsulu mən bilirəm. Bu sahədə də yetəri qədər təcrübəm var və bilirəm ki, hansı vəziyyətdə istifadəçi xətası sayılır hansında yox.

Qısacası səbəb əslində bəllidir. Milləti aldatmaq!

Bu yazıda məqsədim kimdənsə hirsimi çıxmaq vəya başqa birşey deyil. Sadəcə istədim təcrübəmi paylaşım ki, haradan məhsul alacağınıza yaxşı qərar verib bu problemləri yaşamayasınız.

Paypal hesabındaki pulu necə çıxara bilərəm?

Paypal ilə əlaqəli məqalə yazmışdım. Düşünrəm xeyli maraqlı mövzu imiş ki, ziyarətçilər az olsa belə 91 şərh yazılıb :). Bir neçə gün əvvəl paypal səhifəsində yeniliklər etti. Bəzi yeniliklər əlbəttə xoş oldu ancaq xoş olmayan yeniliklər də var. Onlardan biri paypal hesabınızdaki məbləği çıxarmaq ilə əlaqəlidir.

Bildiyiniz kimi, paypal Azərbaycan bank hesablarına pul köçürməyi dəstəkləmir hal hazırda. Ümumiyyətlə paypal hesabındakı pulunuzu nəğdləşdirmənin iki yolu var idi. Biri bank hesabına pul köçürülməsi digəri isə karta pul köçürmə ilə. Bank hesabına pul köçürülməsi ödənişsiz, karta pul köçürmə isə ödənişli idi. Ödəniş təxminən 7.5 türk lirəsi idi.

Bu günlərdə yenilik edildikdən sonra artıq paypal səhifəsində sadəcə bank hesablarına pul köçürülməsi aktiv görünür. Digər yol olan karta pul köçürülməsi isə ləğv edilib. Bu da o deməkdir ki, Azərbaycanda pulu nəğdləşdirmək müşkül məsələyə çevrilib.

paypal-banka-hesabina-para-cekme

Mən də açığı həmişə karta pul köçürmə yolundan istifadə edirdim. Hesabım Türkiyə hesabı olduğu üçün sadəcə Türkiyə banklarına köçürmə edə bilirdim. Ancaq karta köçürmə Azərbaycan bank kartları üçün də mümkün idi. Bu yeniliklərdən sonra karta pul köçürmə çətinliyi ilə qarşılaşdım. Biraz axtarış etdikdən sonra isə bir yolunu tapdım.

Belə ki, əgər hesabınız Türkiyə hesabıdırsa bu linkə daxil olduqda görəcəksiniz ki, yuxarıda göstərdiyim şəkildəki bildirişi alırsınız. Bəlkə də, gələcəkdə artıq bu linkə daxil olduqda yenidən karta köçürmə aktif olacaq onu deyə bilmərəm ancaq hazırda bu bildiriş ekrana çıxır. “Ödeme çekimi şu anda desteklenmiyor.”

Ancaq buradan daxil olsanız görəcəksiniz ki, əvvəli kimi karta pul köçürülməsi hələ də aktivdir. Yəni bu yolla əvvəlki kimi paypal hesabındaki məbləği karta köçürə bilərsiniz. Belə görünür ki, hazırda bəzi ölkələrdə bu funksiya aktivdir. Burada ağlıma iki səbəb gəlir, ya həmin ölkələrdə yeni versiyaya keçməyiblər, ya da doğurdan da bəzi ölkələr üçün bu funskiya məhdudlaşdırılıb.

paypal-banka-hesabina-para-cekme2

Onu da qeyd edim ki, açıqladığım bu yolla bugün (06.10.2015 tarixində) transfer gerçəkləşdirmişəm. Heçbir problem olmayıb. Xeyirlisi ümid edirəm gələcəkdə bu funksiya tamamilə ləğv edilməz vəya ən azından Azərbaycan üçün də bank hesabına transfer aktivləşdirilər.

Paypalın pul göndərmə və alma, sadəcə pul göndərmə əməliyyatına icazə verdiyi ölkələrin siyahısına buradan baxa bilərsiniz.

Hamı öz işiylə məşğul olsun

Deməli bir məsələ biraz canımı sıxır. İstədim bu barədə bəzi fikirlərimi qeyd edim. Yazacaqlarım əslində ikt aləmində çalışanlara aid olacaq, developer, dizayner və s. vəzifələrində çalışanlara.  Daha doğrusu birbaşa onlardan məsul olan şəxslərə.

İKT sahəsi elə geniş və günümüzdəki insanların marağını cəlb edən sahədir ki, qocasından uşağına qədər çox adamın həvəsi var. Əlbətdə maraqlı sahədir. Elə ona görə də ixtisası tamamilə fərqli olan insanlar belə ucundan qulağından bu sahə ilə maraqlanmağa başlayır. Burda bir problem görmürəm. Maraqlanmalıdırlar əlbətdə.

Yəqin mənlə razılaşarsınız ki, günümüzdə artıq demək olar hər bir müəssisənin internet səhifəsi və bu səhifənin dizaynı, proqramlaşdırılması, sosyal şəbəkələrdə tanıdılması üçün xüsusi olaraq işə götürdüyü insanlar var. Hansı ki, işə götürərkən onlarda müvafiq qabiliyyətlərin olmasını arzu edirlər. Eləcə də vakansiyalarda həmin qabiliyyətləri qeyd edirlər və nəticədə həmin qabiliyyətlərin heç olmasa 80-90 faizinə malik olduğuna inandıqları insanları işə qəbul edirlər. Çox gözəl! Bura qədər heç bir problem yoxdur.

Həmin insan hansı ki, dizaynerdir vəya proqramistdir vəya sosial marketinq mütəxəssisidir, bilir nə iş görməlidir və necə görməlidir. Çünki bu qabiliyyətlərinin olduğuna görə işə qəbul edilib!

Ancaq bu insan işə başlayır, deyək ki, dizaynerdir və internet səhifəsinin dizaynını hazırlayır. Təəssüf ki, bu məqamda müəssisə rəhbəri vəya həmin işçidən məsul olan şəxslər hazırlanan işə o qədər müdaxilə etməyə çalışırlar ki, sanki bu iş üzrə mütəxəssisdirlər. Əslində işə götürərkən “kreativ işlər istəyirik“, “bu bizim sahəmiz deyil“, “siz daha yaxşı bilərsiniz” kimi sözlər sərf ediblər ancaq çox bilmişliklərindən də qala bilmirlər. İşin gedişində “məncə buranı bu rəng edək”, “məncə belə edək”, “məncə bu olmasın”, məncə məncə məncə… istədiyiniz qədər bu “məncə” ləri uzatmaq olar.

Bu barədə əslində Barış Özcanın gözəl bir videosu var. Elə onun dediklərini də nəzərə alaraq bəzi məqamları deyəcəm. Sonda isə həmin videonu izləməyiniz üçün paylaşacam.

Deməli hörmətli rəhbərlər (məsul şəxslər) əgər kreativ iş gözlənilirsə və siz bu iş üçün işçi götürmüsünüzsə icazə verin rahat işlərini görsünlər də. Nəyə görə axı ixtisasınız olmadığı halda, bir iki internet səhifəsində, hardasa rastlaşıb qatıldığınız seminarda, kimdənsə eşitdiyiniz nələrəsə görə bu işdən anlayan, bu işin mütəxəssisi kimi hiss edirsiniz özünüzü?

Axı bu iş zənn etdiyiniz qədər sadə məsələ deyil. Məsələn internet səhifəsinin dizaynında istifadə olunan fontundan tutun, səhifədəki boşluqlara qədər hərşeyin öz qaydası qanunu var axı.

Dizayner olmaq, developer olmaq və s. bu qədər asan işdirsə, hamının iki seminar, üç video izləyərək görəbiləcəyi bir işdirsə onda niyə işçi götürüb əlavə xərc çəkirsiniz? Sizə belə davrandıqda işçiniz necə kreativ ola bilər axı? Necə rahat iş görə bilər? Necə özünə güvənə bilər?

Bilərək vəya bilməyərək işçinizə əngəl olduğunuzu unutmayın! Məncə hamı öz işiylə məşğul olsun!

Vəya yenə Barış Özcanın dediyi kimi “Mən əslində bu işləri yaxşı bilirəm. Başım çıxır. Sadəcə vaxtım yoxdur deyə, bu sahədə mənə kömək olsun deyə işçi götürmüşəm” kimi cümlələr sərf edib özünüzü gülünc vəziyyətə salmayın.

Son olaraq çox istərdim aşağıdaki videonu sona qədər izləyəsiniz:

PS: Bunlar mənim şəxsi fikrimdir. Kiminə görə düz, kiminə görə səhv ola bilər. Sadəcə bu mövzuda düşüncələrimi paylaşmaq istədim.

Millinet internet mükafatının nəticələri

Millinet 2014 başlayır başlıqlı yazımla layihənin başlanması haqqında yazmışdım. Nəhayət yarışmada iştirak edən səhifələr dəyərləndirildi.

Nəticələrlə buradan tanış ola bilərsiniz.

www.samadov.net də Bloqlar kateqoriyasında ikinciliyə layiq görüldü.

Açığı Millinet bir ölçü deyil. Ancaq hazırladığınız səhifə haqqında münsiflər heyətinin fikirlərini öyrənmək müsbət birşeydir. Çox təəssüf ki bu fikirləri öyrənə bilmək üçün layihədə Nominant olaraq seçilməlisiniz. Yoxsa münsiflər heyətinin sizin səhifələriniz haqqındaki fikirlərini öyrənmə ehtimalınız yoxdur.

Məsələn, bir il əvvəl 3-cü olmusunuz ancaq, bu il səhifəni təkmilləşdirib (responsive dizayn, iOS və android tətbiq və s.) yenidən iştirak etmək üçün göndərib nəticədə heç nominant belə ola bilmirsinizsə bunun səbəbini öyrənmə şansınız yoxdur. :)

Ümumiyyətlə belə layihələrin Azərbaycanda keçirilməsi gözəldir. Ancaq əksikliklər çoxdur.

Düzdür kənardan durub danışmaq asandır amma düşünürəm ki, deyəcəklərim bir tənqid kimi yox, bir sonraki il üçün daha da diqqətli olmağa dəvət kimi nəzərə alınar.

Belə ki, hazırlanan veb səhifələrə qiymət verən bir layihə olaraq Millinet, əvvəla öz səhifəsini təkmilləşdirməlidir zənnimcə.

Ən əsası səhifənin texniki işlərini məsuliyyətli insanlara və layihənin gedişatı zamanı texniki dəstək göstərən insanları yaxşı seçməlidir. Səhv başa düşülməsin, texniki işləri görə bilməyən insanlara tapşırılır demək istəmirəm sadəcə səhlənkarlıqla yanaşılır. Ola bilər ki, iş yoğunluğundan belə olur ancaq bu bir layihədirsə buna diqqət edilməlidir.

Çünki hər il bu mövzuda çox problemlər yaşanır.

millinet-internet-mukafati

Tənqid kimi bir yazı oldu ancaq ümid edirəm səhv anlaşılmaz və gələcəkdə qüsursuz bir layihə halını alar.

Uğurlar.

Paypal ilə ödəmək və hesabınıza pul köçürmək

İnkişaf edən texnologiya, Azərbaycandaki yeniliklər artıq onlayn alışverişdən istifadə edənlərin sayında artışa səbəb olub. Mən də bu yazımda Paypal ilə ödəmə və hesabımıza pul köçürmək barəsində bildiklərimi paylaşmaq istəyirəm.

Bildiyiniz kimi Paypal onlayn ödəmə sistemidir. Onlayn ödəmə üçün bir vasitədir desək daha doğru olardı. Çünki Paypal ödəməni daha əvvəl Paypal hesabınıza tanıtdığınız plastik kartınız (Kredit kartı, debet kart (VİSA/MASTER)) vasitəsi ilə edir.

Paypal sisteminə kredit kartımı necə əlavə edə bilərəm?

Paypal hesabınıza aşağıdaki şəkildə də göstərilən bölmədən kart əlavə edə bilərsiniz.

paypal-kredit-karti-elave-etmek
Kart Əlavə et düyməsini sıxdıqda aşağdaki səhifə ilə qarşılaşacaqsınız:

paypal-kart-elave-edin

Məlumatları daxil etdikdən sonra kartınız əlavə olunacaq. Onu da qeyd edim ki, bu bölmədə siz həm kredit kartınızı (Bolkart Mastercard, Yapikredi Worldcard, Albalı Mastercard) həm də Visa vəya Master kartınızı (debet kart) əlavə edə bilərsiniz.

Kart əlavə olunduqdan sonra sizin kartınızın təsdiqlənməsi üçün kartın aid olduğu banka Paypal tərəfindən 4 rəqəmli kod göndəriləcək. Əvəzində 1$-2$ arasında bir məbləğ kartınızdan çıxılacaq. Kartınız təsdiqləndikdən sonra həmin məbləğ kartınıza geri qaytarılacaq. Bu kodu Bankla əlaqə saxlayaraq əldə edə bilərsiniz. Kodu daxil edərək kartınızı təsdiqlədikdən sonra istədiyiniz kimi alışveriş edə bilərsiniz.

Ancaq bu kartları (istər kredit kartı olsun istərsə də debet kart) yalnız kredit kartı kimi əlavə edə bilərsiniz. Yəni debet kartınız olsa belə siz onu kredit kartı olaraq əlavə edirsiniz və kart hesabınızda olan pulu xərcləyirsiniz. Bank hesabı kimi Azərbaycan banklarına məxsus kartlarla Paypal ödəmə sistemində işləmək hələ ki mümkün deyil.

Paypal ilə hansı ödəmələr mümkündür?

Paypal ilə birçox ödəməni həyata keçirə bilərsiniz. Onlayn alışveriş, xidmət və s. kimi saytlar ödəmə sistemi olaraq Paypal istifadə edirsə asanlıqla paypal hesabınızla ödəmə həyata keçirə bilərsiniz.

İki paypal hesabı arasında ödəmə edə bilərsiniz. Məsələn, freelancer olaraq evinizdən işlər görürsünüz və xaricdən sifarişlər alırsınızsa, görəcəyiniz işin haqqını Paypal ilə tələb edə bilərsiniz. Qarşı tərəf öz paypal hesabından sizin paypal hesabınıza pul köçürə bilər.

Burada kiçik bir problem var. Paypal sistemində hesab açarkən yaşadığınız ölkə olaraq Azərbaycan seçdiyiniz halda xaricdən sizin hesabınıza ödəmə edə bilməyəcəklər birçox halda. Çünki Paypal Azərbaycan üçün ödəmə qəbul etmir. Eləcə də hesabınızdaki məbləği nəğd olaraq çıxara bilməyəcəksiniz. Bunun üçün də tövsiyyəm paypal hesabı açarkən yaşadığınız ölkə/ünvan olaraq Türkiyə seçməyinizdir. Türkiyə seçdiyiniz zaman Azərbaycanda olsanız da xaricdən paypal hesabınıza göndəriləcək pulu qəbul edə biləcəksiniz. Eləcə də Azərbaycan banklarına aid kredit və debet kartlarınızı istifadə edə biləcəksiniz. Ancaq Bank Hesabı əlavə edə bilməyəcək eləcə də hesabınızdaki məbləği bank hesabınıza köçürə bilməyəcəksiniz.

Paypal hesabınızdaki məbləği Bank hesabınıza köçürmək üçün ən gözəl yol isə hər hansı bir bankda hesab açdırıb, həmin hesaba aid Visa kartını paypal hesabında kredit kartı kimi əlavə edərək Paypal hesabınızdaki məbləği 7.5 türk lirəsi qarşılığında bank hesabınıza köçürə bilərsiniz. Təbii ki bu halda paypal hesabınızdaki pul bank hesabınızın aid olduğu valyutaya görə hesablanaraq hesabınıza keçəcək.

Aşağıdaki şəkillərdə bu daha aydın göstərilir:

Əvvəla hesabınızdaki qalığı göstərən bölmədən “Para çek” bağlantısını sıxaraq aşağıda göstərilən səhifəyə keçid edirsiniz:

paypal hesabından pul çəkmək

Bu səhifəyə keçid etdikdən sonra gördüyünüz kimi iki seçim çıxır qarşınıza. Bank hesabınıza (debet kart hesabı) vəya kredit hesabınıza pulun köçürülməsi şərtləri qeyd edilib. Onu da qeyd edim ki əgər hesabınızı Türkiyə hesabı kimi açmısınızsa Azərbaycan banklarındaki hesab kartınızı burada sadece kredit hesabı kimi əlavə edə bilərsiniz. Yəni başqa bir deyişlə burada göstərilən bank hesabı bölməsinə sadəcə türkiyədəki banklara aid hesabınızı əlavə edə bilərsiniz.

paypal hesabından pul çəkmək

Nümunə olaraq aşağıdaki şəklə baxa bilərsiniz. Unibank VİSA Electron kartına paypal hesabımdan pul köçürmə əməliyyatının fakturası. Onu da qeyd etmək istərdim ki, bu üsülla pul 1 dəqiqə ərzində hesabıma keçir. Ancaq TL-AZN valyuta əməliyyatı zamanı çox itgi olur.

Bank hesabına pul köçürmək - paypal

Mövzu ilə əlaqədar hər hansı sualınız olarsa şərhlər bölməsinə yaza bilərsiniz.

Milli İnternet Mükafatı – Milli Net 2014 başlayır

Milli Net Təşkilat Komitəsi bildirir ki Milli İnternet Mükafatına 25 sentyabr tarixdə  start veriləcək.
İddiaçılar www.millinet.az saytında  qeydiyyatdan keçərək öz İnternet resursları və İnternet layihələrini təqdim edə bilərlər. Keçən ilkindən fərqli olaraq bu il  2 yeni Nominasiya – “Qarabağ haqqında saytlar“ və   “Mobil tətbiqlər” Nominasiyaları daxil edilib. Aşağıdaki kateqoriyalar üzrə səhifələrinizi müsabiqəyə göndərə bilərsiniz:

1.    Korporativ saytlar
2.    İctimai-sosial saytlar
3.    Media və İnformasiya
4.    Mədəniyyət, incəsənət və turizm saytları
5.    Ailə, uşaq və sağlamlıq
6.    Asudə vaxt, idman və əyləncə
7.    Bloqlar
8.    Elm və təhsil
9.    Elektron hökumət
10.    Xidmət (Servis)
11.    Qarabağ haqqında saytlar
12.    İstifadəçi kontenti üzərində qurulmuş saytlar
13.    Mobil tətbiqlər
14.    Ən yaxşı sosial şəbəkə səhifəsi

Müsabiqəyə təqdim olunan saytların qeydiyyatı 2 ay davam edəcək və 25 noyabrda qeydiyyat başa çatacaq.  Qiymətləndirmə prosesi dekabrın 15 –dək davam edəcək. Milli Net 2014 yekun Təqdimat mərasimin dekabrın sonlarında keçirilməsi nəzərdə tutulub.

Ətraflı məlumat üçün millinet internet səhifəsini ziyarət edə bilərsiniz.